Skip to content
April 15, 2012 / Mohamed Amged :)

نصيحة: ماتحلش مشاكل لسة ما قابلتهاش

أهلا بيكم مرة تانية :))  لوأول مرة تدخل المدونة انصحك تقراء الموضوع دا الأول بوست رقم زيرو

النهاردة هكلمكم عن مشكله كبيرة بتواجة كل الfront-end developers أو اي مبرمج تقريبا

“بطل تحل مشاكل لسه ماقبلتهاش!!!!”

الحكاية دي بتحصل لمعظم الناس انك تبتدي تشتغل ع البروجيكت وف وقت معين تبطل تشتغل ف المطلوب منك بالترتيب الموجود، كلنا عارفين اننا لما بنشتغل على اي صفحة بنبقى مرتبين خطواط ورا بعض عشان نوصل للصفحة بشكلها النهائي، ف مرحلة معينة بتلاقي نفسك خرجت بره الروتين وبتبص لاقيت مطلوب منك مثلا ان الصفحة تدعم العرض بشكل صحيح 100% انترنت اكسبلورر 6 ورغم انك مش مطلوب منك تقلق على ازاي هتشتغل ع الموضوع دا، بتلاقي نفسك اتشتت واتضايقت وعمال تدور ع الحل، وانتا ناسي ان مش دا الوقت المناسب للقلق بخصوص الموضوع دا، ياترى هستخدم framework ولا هعمل css خاص بالمتصفح الكارثة دا.

نتيجة للتصرف دا بقيت معطل شغل وبيتكون عليك شغل اكتر مع مرور الوقت.
والحل اية يا معلم؟؟؟!!!

فاكس مشاكل، خليك كوول ونفض لأي مشكله لحد ماتلاقي dependancy للمشكله دي هيعطلك، وف الحالة دي بقى غصب عنك لازم تحل المشكله دي، ساعتها يا برنس مبدأ التنفيض والفكس مش هينفع، لأن كدا العقدة اتربطت ف المنشار.
بالطريقة دي:
  1.   انجزت اكبر قدر من الشغل ف وقت أقل
  2.  كل المشاكل اتحلت ف وقتها المناسب
  3.  سهلت عملية ال TESTING كتير جدا لأني ادركت نقط ضعف الابليكيشن ومشاكله بتظهر ف اي جزء بالضبط.

البوست الجاي ان شاء الله هتكلم على ال HTML5 Caching والميزة دي بتذوت اداء الابليكيشن جدا وبتخليه اسرع اضعاف سرعتة العادية

استنوا البوست دا خلال 3 ايام ان شاء الله

April 13, 2012 / Mohamed Amged :)

مقدم عن الHTML5

اهلا مرة تانية النهاردة هكلمكم عن الHTML5 زي ما قولت ف بوست رقم زيرو اللي فات: تدوينة رقم زيرو

كمقدمة عامة عن التكنولوجي دي

بيقولو ان 3 شهور على الويب تساوي سنة كاملة ف الحقيقة، الhtml5 بتساعدنا بشكل كبير جدا اننا ننجز ف الوقت والجهد وبتسهلنا عملية الصيانة… اشطه يعني!
كمان بتذودنا بمجموعة عناصر جديدة Elements عشان نعمل بيها ال page structure بشكل اسهل. كمان فيه javascript APIs جديدة موجودة ملهاش حل خلتنا مش محتاجين لا فلاش ولا سيلفرلايت ولا اي بتنجان عشان ننجز اي تطبيق ويب.
كمان عجايب ال CSS3 وكمية الابداع اللي اتعمل بيها خلت الناس معادتش بترسم بالفوتوشوب اي حاجة تقريبا لأنها بتوفرلنا rules هندسية بتحدد كل خصائص الشكل من كل النواحي، ال shadows, gradients, and transformations جننت الناس بمدى سهولة استخدامهم، كمان من ناحية اداء الموقع عندك حاجة جامدة جدّي! زي ال cache و الweb SQL دي بتخليك ملك زمانك بتخليك تحط كل البايانات الثابتة ف صفحات الموقع زي القوائم والخلفيات وملفات ال CSS كل دا على جهاز اليوزر بحيث ماتحتاجش كل ما اليوزر يفتح الموقع او ينقل من صفحة لصفحة انه يحمل كل مرة الحاجات دي، كمان ال geolocation رغم انها مؤخرا زاد الجدال عليها لأن بعض الناس بيشوفو انها خطيره امنيا وبتعرض خصوصية اليوزر للاختراق، كمان عندنا حاجة اسمها ال web sockets ودي تقنية شبيهه ولكنها اسرع جدا من الاجاكس ajax وهقولكم على الاختلاف،، الاجاكس بيعمل عمليه polling للريكويست وكل شويه بتبعت للسيرفر ركويست تسأله “عندك جديد ياسطى؟؟” اما ال sockets بتقول للسيرفر مرة واحدة بس “لما يكون عندك جديد يا برنس ابقى بلغني عشان الحته دي تهمني!!” يقوم اول لما يحصل ابديت عند السيرفر السيرفر هو اللي بيقوم بعمليه ال pushing من نفسه.

فيه مميزات اكتر موجودة ف ال HTML5 زي ال جرافيكس SVG&Canvas والComptability. بس انا مش هتكلم فيه دلوقتي لأني بصراحة ماقريتش عنهم حتى الآن. سلاموووز بقى اشوفكم البوست الجاي! :))

April 12, 2012 / Mohamed Amged :)

بوست رقم زيرو

سلام عليكم الاول :)
دي التدوينة رقم 0 ف مدونتي، انا محمد أمجد، بدرس كمبيوتر ساينس ومدون بقالي اكتر من سنة لكن كان تدويني قبل كدا كله ف السياسه، بشارك ف انشطة سياسة احيانا، عندي خبرة ف حاجات كدا على قدي C#, HTML5, javascript, cross mobile native web programming

أنا سعيد جدا ان مدونتي دي من اوائل المدونات اللي هتتكلم عن ال HTML5 وهحاول ان شاء الله على قد ما اقدر اكتب عن حاجات جديدة ومفيدة كمان ممكن لو عجبني بوست ف اي مدونة تانية ممكن استشف منه بعض الافكار.

على كام حاجة تانية بس مش بشكل اساسي، بصراحة انا مش عارف هتكلم عن اية بالظبط ف المدونة دي بس هحاول كل ما اقرأ عن موضوع جديد اكتب عنه، غالبا هتكلم ف ال HTML5 بشكل اكثر من باقي الحاجات.
المدونة هتكون باللهجة العامية لأني بصراحة مليت من موضوع قراية المدونات العربية بالفصحى، صحيح هي لغتنا وبنعتز بيها، أنا كان اسهل عندي جدا اني اكتب بالانجلش بصراحة اسهل من العربي بكتير ف المواضيع دي لكن انا لاقيتها فرصة كويسة ومساهمة لإثراء المحتوى العربي على الانترنت، على فكرة بعشق اللغة العربية لكن الكتابة بالفصحى ف مواضيع بتحتاج شرح مبسط لأقصى درجة زي المواضيع اللي هتكلم عنها ف المدونة ان شاء الله هيكون صعب بالنسبة لشخص عادي زيي ان يصيغ الكتابة بالفصحى بشكل ابسط من العامية، كمان فيه عدة اسباب ممكن اعملها ف تدوينة بعد كدا.